ഹാര്‍ദിക് പാണ്ഡ്യയുടെ തിരിച്ചുവരവിന് വീണ്ടും തിരിച്ചടി; പുതിയ സ്‌കാനിങ്ങില്‍ പരിക്കെന്ന് കണ്ടെത്തി

ഓള്‍റൗണ്ടര്‍ ഹാര്‍ദിക് പാണ്ഡ്യയുടെ വലതുകാലില്‍ പുതിയതായി പരിക്ക് കണ്ടെത്തി. ഇതോടെ ന്യൂസീലന്‍ഡിനെതിരെയുള്ള പര്യടനം ഉള്‍പ്പെടെ കുറഞ്ഞത് മൂന്ന് ആഴ്ചത്തേക്ക് ക്രിക്കറ്റില്‍ നിന്ന് അദ്ദേഹം പുറത്താകും. സെപ്റ്റംബര്‍ 20-നായിരുന്നു പാണ്ഡ്യയുടെ തിരിച്ചുവരവ് തീയതിയായി നിശ്ചയിച്ചിരുന്നത്. ഇതനുസരിച്ച്, ഒക്ടോബര്‍ 6 മുതല്‍ ആരംഭിക്കുന്ന ഓസ്ട്രേലിയ എയ്ക്കെതിരായ ഏകദിന പരമ്പരയ്ക്കുള്ള ഇന്ത്യ എ ടീമിലേക്ക് സെലക്ടര്‍മാര്‍ അദ്ദേഹത്തെ തിരഞ്ഞെടുത്തിരുന്നു.

'ഇത് വളരെ നിര്‍ഭാഗ്യകരമാണ്, എന്നാല്‍ ഹാര്‍ദിക്കിന്റെ ഏറ്റവും പുതിയ സ്‌കാന്‍ റിപ്പോര്‍ട്ടുകള്‍ അദ്ദേഹത്തിന്റെ വലത് കാലിന് പരിക്കുള്ളതായി വെളിപ്പെടുത്തുന്നു. രണ്ടാഴ്ചത്തേക്ക് പൂര്‍ണ്ണ വിശ്രമമാണ് അദ്ദേഹത്തിന് നിര്‍ദ്ദേശിച്ചിരിക്കുന്നത്. ബിസിസിഐയുടെ മെഡിക്കല്‍ പാനല്‍ തലവന്‍ ഡോ. ദിന്‍ഷാ പര്‍ദിവാല അദ്ദേഹത്തിന്റെ റിപ്പോര്‍ട്ടുകള്‍ കണ്ടിട്ടുണ്ട്, ജപ്പാനില്‍ നിന്ന് മടങ്ങിയെത്തിയ ശേഷം അദ്ദേഹത്തിന്റെ സ്ഥിതി വിലയിരുത്തുകയും പുനരധിവാസം എന്ന് ആരംഭിക്കാന്‍ കഴിയുമെന്ന് തീരുമാനിക്കുകയും ചെയ്യും' സിഒഇ നിരീക്ഷകന്‍ പറഞ്ഞു.

ഒക്ടോബര്‍ 22-നാണ് ന്യൂസിലന്‍ഡ് ടി20 പരമ്പര ആരംഭിക്കുന്നത്, തുടര്‍ന്ന് ഏകദിന പരമ്പരയും നടക്കും. അതിനുമുമ്പ് ഹാര്‍ദിക് തിരിച്ചെത്താന്‍ ഒരു സാധ്യതയുമില്ല. ഏഷ്യന്‍ ഗെയിംസിനായി ടീമിനൊപ്പം ജപ്പാനിലേക്ക് പാണ്ഡ്യയെ അയക്കാന്‍ ബിസിസിഐ ആഗ്രഹിച്ചിരുന്നതായും ബിസിസിഐയുടെ ഓപ്പറേഷന്‍സ് ടീം വിസ സംബന്ധമായ ആവശ്യങ്ങള്‍ക്കായി അദ്ദേഹത്തിന്റെ പാസ്പോര്‍ട്ട് വാങ്ങിയിരുന്നു. എങ്കിലും, അഫ്ഗാനിസ്ഥാന്‍ ടി20 പരമ്പര ആരംഭിക്കുന്നതിന് തൊട്ടുമുമ്പ്, ഫീല്‍ഡിങ് പരിശീലനത്തിനിടെ അദ്ദേഹത്തിന് കാല്‍മുട്ടിന് ചുറ്റും പെട്ടെന്ന് കഠിനമായ വേദന അനുഭവപ്പെട്ടു. തുടര്‍ന്ന് അദ്ദേഹം കുറച്ചുദിവസം വിശ്രമിക്കാന്‍ തീരുമാനിച്ചു. എന്നാല്‍ ഫിറ്റ്‌നസ് സര്‍ട്ടിഫിക്കറ്റ് ലഭിക്കാന്‍ തയ്യാറെടുക്കുന്നതിനിടെ വീണ്ടും വേദന അനുഭവപ്പെടുകയും സ്‌കാനിംഗില്‍ പരിക്ക് കണ്ടെത്തുകയുമായിരുന്നു.

ഐപിഎല്‍ അവസാനിച്ചതിനുശേഷം 32 വയസ്സുള്ള പാണ്ഡ്യ ബെംഗളൂരു കേന്ദ്രീകരിച്ചാണ് പ്രവര്‍ത്തിക്കുന്നത്. ഗാര്‍ഡന്‍ സിറ്റിയിലേക്ക് മാറിയ അദ്ദേഹം ഇപ്പോള്‍ സെന്റര്‍ ഓഫ് എക്‌സലന്‍സിലാണ് പരിശീലനം നടത്തുന്നത്. എന്നാല്‍ കഴിഞ്ഞ നാല് മാസത്തിനിടെ, കുറഞ്ഞത് മൂന്ന് തവണയെങ്കിലും (അഫ്ഗാനിസ്ഥാന്‍ ഏകദിനം, ഇംഗ്ലണ്ട് ടി20, ഇപ്പോള്‍ ഓസ്ട്രേലിയ എ) ഓള്‍റൗണ്ടര്‍ക്ക് പുതിയ പരിക്ക് അനുഭവപ്പെട്ടു, ഇത് അദ്ദേഹത്തിന്റെ തിരിച്ചുവരവിന് തടസ്സമായി മാറിയിരിക്കുകയാണ്. ന്യൂസീലന്‍ഡ് പരമ്പരയും നഷ്ടമാകുന്നതോടെ, പാണ്ഡ്യക്ക് ഇനി സിംബാബ്വെ ഏകദിന പരമ്പര വരെ കാത്തിരിക്കേണ്ടി വരും. അല്ലെങ്കില്‍ വിജയ് ഹസാരെ ട്രോഫിയിലോ സയ്യിദ് മുഷ്താഖ് അലി ട്രോഫിയിലോ ഫിറ്റ്‌നസ് തെളിയിക്കേണ്ടി വരും.

content highlights: Setback for Hardik Pandya's Comeback: New Scans Reveal Injury